എസ്.ബി.ഐ ബാങ്ക് അക്കൗണ്ട്; സ്ത്രീകൾക്ക് 10 ലക്ഷം രൂപ വരെ സൗജന്യ ആനുകൂല്യങ്ങൾ, മലയാളികൾക്കുള്ള നേട്ടങ്ങൾ
10 ലക്ഷം രൂപയുടെ വരെ സൗജന്യ ഇൻഷുറൻസ് പരിരക്ഷ നേടാനും അവസരമുണ്ട്.
രാജ്യത്തെ ഏറ്റവും വലിയ പൊതുമേഖലാ ബാങ്കായ സ്റ്റേറ്റ് ബാങ്ക് ഓഫ് ഇന്ത്യയിൽ (SBI) അക്കൗണ്ട് ഉള്ള വനിതകൾക്ക് നിരവധി ആനുകൂല്യങ്ങൾ ലഭ്യമാണ്. 10 ലക്ഷം രൂപയുടെ വരെ സൗജന്യ ഇൻഷുറൻസ് പരിരക്ഷ നേടാനും അവസരമുണ്ട്. ബാങ്ക് സ്ത്രീകൾക്കായി പ്രത്യേകമായി ‘വനിതാ സേവിംഗ്സ് അക്കൗണ്ട്’ എന്ന പേരിൽ ഒറ്റ അക്കൗണ്ട് നൽകുന്നില്ലെങ്കിലും, വനിതാ നിക്ഷേപകർക്കും സംരംഭകർക്കുമായി വിപുലമായ ആനുകൂല്യങ്ങളും കേന്ദ്രസർക്കാർ ധനസഹായ പദ്ധതികളും ലഭ്യമാക്കുന്നുണ്ട്. 7.5% ഉറപ്പുള്ള പലിശ നിരക്ക് നൽകുന്ന ‘മഹിളാ സമ്മാൻ സേവിംഗ്സ് സർട്ടിഫിക്കറ്റ്’ (MSSC), ‘നാരി ശക്തി’ പ്ലാറ്റിനം ഡെബിറ്റ് കാർഡ്, ബിസിനസ് വായ്പകൾക്കുള്ള ഇളവുകൾ എന്നിവ ഇവയിൽ പ്രധാനമാണ്. മലയാളികൾക്കും ഇതിലൂടെ നേട്ടമുണ്ടാക്കാം.
സീറോ ബാലൻസ് അക്കൗണ്ടുകൾ
എസ്.ബി.ഐ സാധാരണ സേവിംഗ്സ് അക്കൗണ്ടുകളിൽ മിനിമം ബാലൻസ് തുക സൂക്ഷിച്ചില്ലെങ്കിലുള്ള പിഴ ഒഴിവാക്കിയിട്ടുണ്ട്. ഇത് വീട്ടമ്മമാർക്കും, വിദ്യാർത്ഥിനികൾക്കും അക്കൗണ്ട് കൈകാര്യം ചെയ്യുന്നത് എളുപ്പമാക്കുന്നു
‘നാരി ശക്തി’ പ്ലാറ്റിനം ഡെബിറ്റ് കാർഡ്
വനിതാ അക്കൗണ്ട് ഉടമകൾക്കായി എസ്.ബി.ഐ നൽകുന്ന പ്രത്യേക ഡെബിറ്റ് കാർഡാണ് നാരി ശക്തി പ്ലാറ്റിനം ഡെബിറ്റ് കാർഡ്. ഇതിലൂടെ വർഷത്തിൽ സൗജന്യ ഹെൽത്ത് ചെക്കപ്പ്, 10 ലക്ഷം രൂപയുടെ വ്യക്തിഗത അപകട ഇൻഷുറൻസ് കവറേജ്, ഷോപ്പിംഗ്, ബുക്ക് മൈ ഷോ, പ്രമുഖ ഇ-കോമേഴ്‌സ് പ്ലാറ്റ്‌ഫോമുകൾ എന്നിവയിൽ ഡിസ്‌കൗണ്ടുകളും റിവാർഡ് പോയിന്റുകളും തുടങ്ങിയവ ലഭ്യമാകുന്നു.
മഹിളാ സമ്മാൻ സേവിങ്സ് സർട്ടിഫിക്കറ്റ്
സ്ത്രീകൾക്കായി കേന്ദ്ര സർക്കാർ ആവിഷ്കരിച്ച ‘മഹിളാ സമ്മാൻ സേവിംഗ്സ് സർട്ടിഫിക്കറ്റ്’ എസ്.ബി.ഐ ശാഖകൾ വഴി ലഭ്യമാണ്. 2 വർഷത്തെ കാലാവധിയിൽ 7.5% ഉയർന്ന പലിശ നിരക്കിൽ 2 ലക്ഷം രൂപ വരെ നിക്ഷേപിക്കാം. സാധാരണ ബാങ്ക് എഫ്.ഡി പലിശകളേക്കാൾ ഇത് ആകർഷകമാണ്.
വനിതാ സംരംഭകർക്കായി വായ്പാ ആനുകൂല്യങ്ങൾ
സ്വയംതൊഴിൽ കണ്ടെത്താൻ ആഗ്രഹിക്കുന്ന മലയാളി വനിതകൾക്കായി കുടുംബശ്രീ സ്കീമുകളുമായും ‘എസ്.ബി.ഐ അസ്മിത (SBI Asmita)’ പദ്ധതിയുമായും ചേർന്ന് കുറഞ്ഞ പലിശ നിരക്കിലും, അഡ്മിനിസ്ട്രേഷൻ ചാർജുകളിലെ ഇളവുകളോടെയും വായ്പകൾ ലഭ്യമാക്കുന്നു. സ്ത്രീകളുടെ പേരിൽ ഭവന വായ്പയോ, വാഹന വായ്പയോ എടുക്കുമ്പോൾ പലിശ നിരക്കിൽ പ്രത്യേക ഇളവ് ലഭിക്കും
