പഴയ ട്രാക്കിലേക്ക് മടങ്ങി എത്താൻ നാനി, പ്രണയ ചിത്രത്തിൽ നായകനാകാൻ താരം, തീരുമാനത്തിന് പിന്നിൽ ഇതാണ്
സമ്മിശ്ര പ്രതികരണങ്ങള്‍ക്കിടയിലും ആഗോള ബോക്സ് ഓഫീസ് കളക്ഷനില്‍ മികച്ച കുതിപ്പാണ് ദ പാരഡൈസ് നേടുന്നത്.
തെലുങ്ക് താരം നാനിയുടെ കരിയറിലെ ഏറ്റവും വലിയ ചിത്രമായിരുന്നു അടുത്തിടെ പുറത്തിറങ്ങിയ ‘ദ പാരഡൈസ്’. ശ്രീകാന്ത് ഒഡേല സംവിധാനം ചെയ്ത ഈ ചിത്രം സമ്മിശ്ര പ്രതികരണമാണ് നേടിയത്. ചിത്രത്തിന് നേരിട്ട തിരിച്ചടിക്ക് പിന്നാലെ ട്രാക്ക് മാറ്റത്തിന്‍റെ സൂചന നൽകുകയാണ് നാനി. അടുത്ത് തന്നെ തന്‍റെ മനോഹരമായ ഒരു പ്രണയചിത്രം കാണാമെന്നാണ് നാനി പറയുന്നത്.
സുജീത് സംവിധാനം ചെയ്യുന്ന ‘ബ്ലഡി റോമിയോ’ ആണ് നാനിയുടെ അടുത്ത ചിത്രം. ഇതും ഒരു ആക്ഷൻ ചിത്രമാണ്. ഈ ചിത്രത്തിന് ശേഷമായിരിക്കും പ്രണയ ചിത്രത്തിൽ നാനി അഭിനയിക്കുക. അതേസമയം ചിത്രത്തിന്‍റെ കൂടുതൽ വിവരങ്ങൾ പുറത്ത് വന്നിട്ടില്ല.
‘ദ പാരഡൈസ്’ എന്ന ചിത്രത്തിന് ‘എ’ സർട്ടിഫിക്കറ്റ് ലഭിച്ചതിനാൽ കുട്ടികൾക്ക് തിയേറ്ററിൽ കാണാൻ കഴിഞ്ഞില്ലെന്നും, പൊതുപരിപാടികളിൽ തന്നെ കാണുമ്പോൾ ആദ്യം ഓടിയെത്തുന്ന കുട്ടി ആരാധകർക്ക് കാണാൻ സാധിക്കുന്ന തരത്തിലുള്ള ചിത്രങ്ങൾ ചെയ്യണമെന്ന ആഗ്രഹമാണ് പുതിയ തീരുമാനത്തിന് പിന്നിലെന്നും നാനി വ്യക്തമാക്കി. ദ ഹോളിവുഡ് റിപ്പോർട്ടർ ഇന്ത്യക്ക് നൽകിയ അഭിമുഖത്തിൽ സംസാരിക്കുകയായിരുന്നു താരം.
200 കോടി കടക്കും
സമ്മിശ്ര പ്രതികരണങ്ങള്‍ക്കിടയിലും ആഗോള ബോക്സ് ഓഫീസ് കളക്ഷനില്‍ മികച്ച കുതിപ്പാണ് ദ പാരഡൈസ് നേടുന്നത്. ആഗോളതലത്തില്‍ ആകെ 170 കോടിക്ക് മുകളിൽ ചിത്രം നേടിക്കഴിഞ്ഞു. തെലുങ്കില്‍ മാത്രമായി ചിത്രം 100 കോടി രൂപയ്ക്ക് മുകളിൽ വാരിക്കൂട്ടി. കിൽ എന്ന ചിത്രത്തിലൂടെ ശ്രദ്ധ നേടിയ ബോളിവുഡ് താരം രാഘവ് ജൂയൽ ആണ് ഈ ചിത്രത്തിൽ വില്ലൻ വേഷത്തിലെത്തുന്നത്.
